Wanneer ek by my studeerkamer se venster uitkyk sien ek ‘n pragtige groot boom –
groot en majestieus met takke wat wyd uitstrek en skadu bied –
stewig geplant in die grond - met wortels wat diep en wyd sprei.
Die boom herinner my aan ‘n beeld wat Brian Zahnd gebruik wanneer hy iets probeer sê oor hoe ons die Bybel moet sien in verhouding met die daaglikse uitlewing van ons geloof.
Brian sê dat die uitlewing van ons geloof in Jesus Christus so
os ‘n boom is wat geplant is in die grond van die Skrif. Wanneer jy probeer om die boom uit die grond te haal, gaan dit nie oorleef nie – en tog moet ons nie dink dat die boom en die grond dieselfde is nie.
Hulle is nie!
Die Bybel en die uitlewing van jou geloof is aan mekaar verbind, maar dit is nie dieselfde nie.
Die grond waarin ons Christelike geloof geplant is gaan nie verander nie.
Die kanon van die Skrif is gesluit.
Maar dit beteken nie dat jou geloof nie met tyd kan groei, verander, ontwikkel en volwasse word en wyer kan strek as die grond waarin dit geplant is nie!
Dink vir ‘n oomblik aan die tema van slawerny in die Bybel.
Kyk wat staan in Exodus 21:20-21:
En as iemand sy slaaf of slavin met 'n stok slaan, dat dié onder sy hand sterwe, moet dit sekerlik gewreek word. Maar as hy ná een of twee dae nog lewe, moet dit nie gewreek word nie, want hy is sy eiendom.
Kan jy glo wat die Bybelgedeelte sê?!
As 'n slawe eienaar 'n slaaf slaan en die slaaf sterf dadelik, moet daar een of ander vorm van straf wees. Maar as die slaaf vir 'n dag of twee aan die lewe vasklou en dan sterf, is daar geen straf nie.
Hoekom nie?
Want: die Bybel sê die slaaf is die eienaar se eiendom.
Stem jy hiermee saam?
Ek hoop jy sê “Nee!!!”
Ek hoop dat jy saamstem dat slawerny 'n morele euwel is wat op geen manier geregverdig kan word nie! Dit is onversoenbaar met God se geregtigheid.
Maar jy besef die dilemma wat ons het as jy met my saamstem?
Dit beteken dat as dit by die onderwerp van slawerny kom, het ek en jy 'n beter morele visie as die Bybel!
En dit help nie om vinnig na die Nuwe Testament te blaai en te hoop vir ondersteuning daar nie! In Efesiërs 6:5 sê Paulus dat slawe hulle eienaars moet gehoorsaam in vrees en bewing.
Die waarheid is dat die Bybel nie vir jou 'n versie gaan gee vir die afskaffing van slawerny nie. Wat jy uit die Bybel kan aflei is dat slawerny bloot as 'n feit van die lewe beskou is waarbinne geleef moet word.
En dit is dan net hier waar ons sien dat die boom van geloof, geplant in die grond van die Skrif, sy takke wyer begin sprei. Wanneer die Bybel aanvaar dat slawerny beide 'n verdraaglike en onveranderlike instelling is, beteken dit nie dat dit die etiese standpunt oor slawerny is wat Jesus se volgelinge vandag moet he nie!
‘n Volgeling van Jesus is nie 'n slaaf van die Bybel nie – ‘n volgeling van Jesus is verbind aan die opgestane Christus – die lewende Woord van God! Uit die grond van die Skrif groei 'n volwasse geloof wat alle vorme van slawerny in die naam van die opgestane Christus teë staan.
Want dit is wat liefde doen!
En dit is ook presies wat Jesus doen!
Wanneer ‘n vrou na Hom gebring word om op grond van die Skrif gestenig te word, sprei Jesus die takke van die boom om die vrou te beskerm teen die klippe.
Wanneer melaatses op grond van die Skrif uit die samelewing gestoot word, sprei Jesus die takke van die boom om die melaatses aan te raak en in te nooi.
Om te sê dat Christelike geloof een-en-die-selfde met die Bybel is, is 'n fundamentele fout wat uiteindelik onhoudbaar is. Dit lei tot die instandhouding van slawerny, die begin van kruistogte, die goedpraat van kolonialisme. Dit lei tot die gooi van klippe na ‘n weerlose vrou omdat die Skrif so sê.
Ek stem saam met Brain Zahnd wanneer hy sê om in die Skrif gewortel te wees, en om soos ‘n boom met takke wyd gesprei te lewe, is beide konserwatief en progressief. Konserwatief in die sin dat dit die belangrikheid van die Skrif erken. Progressief omdat dit 'n noodsaaklike onderskeid tref tussen die lewende geloof en die historiese teks.
Dit is natuurlik net hier waar baie debatte gevoer word - tussen die boom wat sy takke sprei en die grond waarin dit geplant is. Debatte oor die lewende geloof en die historiese teks.
Maar dit is niks vreemd nie. Van die begin af was die twisgesprekke daar... oor kos wat aan gode geoffer word, oor die besnydenis. Later strydgesprekke oor die plek van die vrou in die gemeente, oor klein en groot doop, nog later oor homoseksualiteit...
Ek is bly dat ek vandag weer hieraan herinner kon word deur die groot boom, geplant in die grond, hier in my tuin. Ek dink dit is nodig dat ek hierdie prentjie onthou wanneer ek sien hoe gelowiges die Bybel gebruik om mekaar met klippe te gooi.
Ek is lief vir die Bybel. Ek lees en preek die Bybel.
Maar my geloof is groter en wyer as die Bybel.
Uiteindelik is dit die opgestane Christus, die lewende Woord van God, wat die Bybel en my geloof onderhou.
تعليقات